५. वायदा पोहों
आब्राम आने सारे कनान पोच्ये त्या विस वोरहा पासे हुदुं बी त्याहां कायज पोहें नाय आतें | पोरमेहेराय आब्रामाल आख्यां आन बिहरे दा वायदों कोअयो का त्याल योक पोहों ओअरी आन त्याआ वोंश आकासामाने चांदला रोके ओअरी | आब्रामाय पोरमेहेरा वायदा उपे ईमान थोव्यो |ते आब्रामा दोनारी सारेय त्याल आख्यां, देख पोरमेहेराय मां कुख बोंद कोंई थोवली हेय, याहाटी आंय तूल विनती कोहूँ का तूं मां नोकरानी हागारी पाही जो | तूं तीये आरी वोराड बी कोअजे, का तीं कोय मां कुख बोआय सेके |ते आब्रामाय हागारी आरी वोराड कोअया | हागारील आब्रामाकोय योक पोहों जायो, आब्रामाय त्या नाव ईश्माएल थोव्यां | आब्रामा इछा आती का पोरमेहेर ईश्माऐलालबोरकत देय | पोरमेहेराय आख्यां, ‘’आंय त्याल बोरकत दीहीं, पेन ईश्माएल वायदा पोहों नाय हेय | आंय मां वायदों त्याआ आरी नाय बांदहीं’’|‘’तोअ दोनारी सारे कोय तूल योक पोहों ओअरी | आन तो वायदा पोहों ओअरी | आन तूं त्या नाव इसाक थोवजे | मां वायदों त्याआ आरी ओअरी, आन तो योक मोठी जाती ओअरी |’’ पोरमेहेराय आख्यां का आमी तोअ नाव आब्राम नाय ओअरी अब्राहाम ओअरी, ज्या मतलब हेय- ‘’मेनआबहो’’ पोरमेहेराय सारे नाव बोदलीन सारा थोव्यां, ज्या मतलब हेय, ‘’मेनआयहों’’सेले माय, जोवे अब्राहाम होव वोरहा जायो आन सारा नोव्वद वोरहा ते, साराय अब्राहामा पोहाल जोनमो देनो | त्याहाय त्या नाव इसाक थोव्यां, जेहेकोय का पोरमेहेराय आखलां आतां|जोवे इसाक जुवान जायो, पोरमेहेराय अब्राहामाल ईं आखिन पोरिक्षा लेदी,’’ तोअ योकुलता योक पोहों इसाकाल होमबली कोइन चोडवे| पासी अब्राहामाय पोरमेहेरा हुकुम मान्यो, आन त्याआ पोहा बोलिदान दाआ हाटी तियार ओई गोयों |तोवे अब्राहामाय योक वेदी बोनाड़ीन लाकडे होदीहोदीन थोव्यें आन त्याआ पोहों इसाकाल बान्दीन वेदी वोने लाकडाहाँ वोय थोवी देनो | जेहेकोय तो त्याआ पोहाल मारां आतो, का पोरमेहेराय आख्यां ‘’उबोरो’’! त्या पोहावोय आथ मा लावहे, आन नाय त्याल कांय कोअतो | काहाका तुयें मांहीने तोअ योक पोहों पेन योकुल्तो योक पोहों बी नाय राखी थोव्यो; याकोय आमी आंय जाई गोयों का तूं पोरमेहेरा बिख दोअतोहो |तोवे अब्राहामाय त्याआ डोळहाकोय आजू काय देख्यां का त्याआ पासाडी योक मेंडा जाड़ीमाय गुती गोयलां हेय | सेले: अब्राहामाय जायने त्या मेंडाल लेदां आन त्याआ पोहों इसाका जागावोय त्याल होमबली कोइन चोडव्या | अब्राहामाय खुशीने साथे त्या मेंडाल होमबली कोइन चोडव्या |पासे पोरमेहेराय अब्रामाल आख्यां का, ‘’ तूं मांन तोअ बादां काय दाआहाटी तियार ओई गोयों, इही हुदू का तोअ योकुलता योक पोहाल बी नाय राखी थोव्यो , या लिदें आंय खोरांज तूल बोरकत दीहीं |’’ आन खोरांज तोअ वोंश आकासा चान्दाला रोकां नाय गोणाय ओले कोअही | आन दोरती बादी जाती तोअ लिदें सोतहाल धन्य मानी; काहाका तुये मां गोठ मानली हेय |
बायबल कहानिमाय : उत्पत्ति १६-२२
